Organisašuvdna MÄN, sámi dearvvašvuođafierpmádat ja Sáminuorra háledit álggahit doarjjačatta gos namaheamit sáhttá čállit ja gulahallat iežá sámiiguin.
Sin doaivva lea ahte dát čatta sáhttá botket olbmuid oktanasvuođa ja daidda olbmuide geat dárbbahit, addit vejolašvuođa ságastit soapmásiin áššiid birra mat deddet.
Inga Kuoljok lea kuráhtor ja sus lea vuordámus ahte sii besset mátkái dáinna čattiin.
- Nuorra dievddut dárbbahit soapmása geainna sáhttet ságastit árgabeaivvi birra, boazodoalu ja boahtteáigi ja ollusat surret dálkkadagain.
Dalle livččii vuogas beassat muitalit iežas jurdagiid ja dovdduid soapmásiin anonymalaččat.
Dát čattajurdda lea vuolgan organisašuvnna Sáminuora ovdalaš prošeavttas Mannen Myten, mas sámi nuorra dievddut ja bártnit ságastalle sierralágán áššiid birra ja de loktanii jurdda dakkára álggahit.
- Sáminuora bealis sii atnet dehálažžan ahte sámi dievddut váldet ovddasvástádusa dásseárvui, dat ii leat beare nissonášši.
Dat guoskkaha juohke ovtta, dadjá Juhán Nila Stålka, gii lea ovdalaš stivralahttu muhto dán čattaprošeavttas Sáminuora ovddasteaddji